عرس وطني

اليوم تحرك المجتمع المدني عم بيطالب الإعتراف بالزواج المدني بالوقت يللي من شي اسبوع زمان وزير الداخلية دلنا ع طريق قبرص وخبرنا إنها بعيدة ضربت حجر … يعني للصراحة شو بدي قلكن يا شبيبة الله يأجركن ويساعدكن، بس إنتوا فهمتوا كلاموا غلط هوي كل قصدو إنو يساهم بزيادة الحركة ع متن طيران الشرق الاوسط بس إنتو نيتكن سيقا وكل يللي بهمكن تعارضوا، وما بيعجبكن العجب وبنيتكن الخراب والدمار للبلد إنو  عارفين إنو بهيدي  الطريقة بتكونوا عم بتساهموا بتغيّر الديموغرفي، معقول علوش يسكن هوي ومرتو انطوانيت بصيدا؟؟ أو فطوم تعيش مع زوزو بالزوق ؟؟؟
بعدين بلعبتكن هيدي  بتقطعوا برزق الجهات الدينية الموقرة إنو مثلاً خلينا ناخد ابونا مطانيوس خادم رعية الضيعة معقول يتخلى عن المرسيديس الكوبريسور ويعمل متل ما عمل مار شربل، الحرديني وغيرن من ولاد الكنيسة  ويحمل المعدور وينزل ينكش أرض الدير حتى يزرع فيها شوية خضرا يبيعن ويكال  ويطعمي ولاد رعيتو بمصرياتون (ولك هودي ما بيطعموا سوشي شو قصتك إنت؟؟ ) أو مثلاً  يروح يحطّب ؟؟؟ إنو معقول راسك إنت ؟  ما إنت بدك تتطلع لأبعد من من منخارك ليش؟؟؟ لأنو إذا تزوجت بالكنيسة، بصير بدك تجيب وثيقة الزواج من الكنيسة، وأول ما الله يطعمك ولد بدك تعلموا بالكنيسة وبعد العمادة بتجي القربانة وبعدا عرسو وبعدا وثيقة وفاتك يعني دورة وملتقية وبالمختصر المفيد  هودي كلن أموااااال عم بتفوت  … بمعنى تاني بيور بيزنيس …بالأملية ما تفهموني غلط ما أنا إبن الكنيسة وبتمم واجباتي الدينية على أكمل وجه  بس كمان مش غلط ابداً إنّا نتطور ونتقدم وما نضل  مخبين ورا  راية الدين والامور السطحية السخيفة … إنو إذا محمد نغرم بريتا ممنوع يتزوجوا ؟؟؟؟ ليش  ومين حرّم ؟؟؟ بعدين هيدا سمير تزوج رفقا ولليوم بتفكرن عصافير الحب وجوليات وطوني كل يوم صوتن متلا الحي.  روحوا عملوا عرس مدني وطني بركي هيدا الشي بغير شوية عالم بعقلية جاهلية…

 

الاسماء المستعملة بالمقال مش صحيحة ولا تمت للحقيقة بأي صلة

Advertisements

ما تنسى تعلق

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s